ՀԷՑ. Շուրջ 70 ընկերություն պատրաստակամություն է հայտնել մասնակցելու շուկայի ուսումնասիրության նախնական փուլին

Արմինֆո.  «ՀԷՑ» ՓԲԸ կողմից նախաձեռնված գնահարցման գործընթացի կազմակերպման համար շուկայի նախնական ուսումնասիրության փուլին մասնակցության պատրաստակամություն են հայտնել շուրջ 70 ընկերություններ: Այդ մասին հաղորդում է «ՀԷՑ» ՓԲԸ հասարակայնության և ԶԼՄ-ների հետ կապերի բաժինը:

Աղբյուրի համաձայն, նախօրեին «ՀԷՑ» ՓԲԸ-ում մեկնարկել են ժամանակավոր կառավարչի նշանակումից ի վեր առաջին գնահարցման (գնանշման) գործընթացները, որոնք նախորդել են ՀԷՑ կարիքների համար նախագծային ծառայությունների և ուժային մալուխի ձեռքբերման նպատակով նախատեսված գնումների գործընթացներին:

«Թե՛ գնահարցման փուլը, և թե՛ բուն գնումների գործընթացներն առավել թափանցիկ, ներառական և մրցակցային պայմաններում իրականացնելու համար հայտարարվել էր այդ գործընթացներում ոլորտի տնտեսավարող շահագրգիռ սուբյեկտներին առավելագույն ներգրավվածություն ապահովելու հանարավորության մասին:

Գնահարցման գործընթացին մասնակցելու պատրաստակամություն են հայտնել ոլորտում տնտեսվարող շուրջ 70 ընկերություններ:

«Հայաստանի Էլեկտրական Ցանցեր» ՓԲԸ-ն տեղեկացնում է, որ Ընկերության պատասխանատու ստորաբաժանումները կապ կհաստատեն մասնակցության հայտ ներկայացրած բոլոր ընկերությունների հետ, կտրամադրեն գնման առարկաների տեխնիկական բնութագրերը, որից հետո չորս աշխատանքային օրերի ընթացքում վերջիններիցս կակնկալվի գնառաջարկների ներկայացում: Ներկայացված գնառաջարկները հիմք կհանդիսանան ձեռք բերվող ծառայությունների և ապրանքների նախահաշվային արժեքների ձևավորման համար:

Հայտնում ենք, որ «ՀԷՑ» ՓԲԸ կարիքների համար նախագծային աշխատանքների և ուժային մալուխների ձեռքբերման նպատակով գնահարցման փուլի ամփոփումից հետո սահմանված կարգով կհայտարարվի 5 մրցութային գնման գործընթաց՝ տարբեր չափորոշիչներով», - ասվում է հաղորդագրությունում: