Ռոմանոս Պետրոսյան․ ՀԷՑ ՓԲԸ վճարել է մոտ 63,7%-ով ավելի հարկեր եւ տուրքեր

Արմինֆո. 2025թ. 2-րդ կիսամյակում ՀԷՑ-ի կողմից վճարվել է ընդհանուր՝ 8,636 մլրդ ՀՀ դրամի հարկեր եւ տուրքեր. նախորդ տարվա նույն ժամանակաշրջանի համեմատ՝ շուրջ 3,4մլրդ ՀՀ դրամով կամ մոտ 63,7%-ով ավելի։ Այդ մասին հաղորդել է ՀԷՑ ՓԲԸ ժամանակավոր կառավարիչ Ռոմանոս Պետրոսյանը։

«2024թ. նույն ժամանակահատվածում ՀԷՑ-ի վճարած հարկ ու տուրքերի հանրագումարը կազմել է՝ շուրջ 5,277 մլրդ ՀՀ դրամ։

2025թ. 2-րդ կիսամյակում ՀԷՑ-ի կողմից իր աշխատակիցներին վճարված աշխատավարձի գծով բոլոր վճարումները կազմում են՝ 9,547 մլրդ ՀՀ դրամ (առանց եկամտային հարկի). նախորդ տարվա նույն ժամանակահատվածի համեմատ՝ շուրջ 744 մլն ՀՀ դրամով կամ մոտ 8,5%-ով ավելի։

2024թ. նույն ժամանակաշրջանում ՀԷՑ-ի վճարած աշխատավարձի գծով բոլոր վճարումները կազմել են՝ շուրջ 8,803 մլրդ ՀՀ դրամ։

Ընդ որում, 2025թ. 2-րդ կիսամյակի ընթացքում ՀԷՑ-ի կողմից վճարված՝ թե՛ հարկ ու տուրքերը, եւ թե՛ աշխատավարձի գծով բոլոր վճարումները (ՀԾԿՀ կողմից վարչական վարույթի նախաձեռնման եւ Ժամանակավոր կառավարչի նշանակումից հետո) էապես գերազանցել են նաեւ 2025թ.-ի առաջին կիսամյակի արդյունքներին։ Այդ շրջանում վճարվել է շուրջ 7,359 մլրդ ՀՀ դրամի չափով հարկ եւ տուրքեր, իսկ վճարված աշխատավարձի գծով բոլոր վճարումների հանրագումարը կազմել է՝ շուրջ 8,238 մլրդ ՀՀ դրամ։ ՀԷՑ-ն այլեւս ծառայում է մեր ժողովրդին», - գրել է Ռոմանոս Պետրոսյանը՝ «Ֆեյսբուքի» իր էջում։

Հիշեցնենք, որ 2016 թվականից "Հայաստանի էլեկտրական ցանցեր" ՓԲԸ-ն պատկանում է ռուսաստանահայ գործարար Սամվել Կարապետյանի հիմնադրած "Տաշիր" ընկերությունների խմբին: Վարչապետ Նիկոլ Փաշինյանը հայտարարել է ՀԷՑ-ը պետականացնելու մտադրության մասին՝ Կարապետյանի տան խուզարկությունից և նրա կալանավորումից հետո: Ավելի ուշ խորհրդարանն ընդունել է օրենքների փոփոխություններ, որոնք նախատեսում են "էլեկտրացանցերի" վերադարձ պետական վերահսկողության ներքո: Իսկ ՀԾԿՀ ղեկավարը ժամանակավոր կառավարիչ է նշանակել Ռոմանոս Պետրոսյանին։

Հուլիսի 22-ին "Տաշիր" ընկերությունների խմբի ղեկավար Սամվել Կարապետյանն ու նրա ընտանիքը շահել են ՀԷՑ-ի պետականացման գործով Հայաստանի կառավարության դեմ կայացած արբիտրաժային վեճը: Սակայն Ռոմանոս Պետրոսյանը նշել է, որ արբիտրաժի վճիռը Հայաստանում իրավական ուժ կստանա միայն դատարանի համապատասխան որոշումից հետո, իսկ ՀՀ արդարադատության նախարար Սրբուհի Գալյանն, իր հերթին, նշել է, որ Ստոկհոլմի Առևտրի պալատի արբիտրաժային ինստիտուտի վճիռը՝ հօգուտ Սամվել Կարապետյանի Հայաստանի դեմ արբիտրաժում, ենթակա չէ պարտադիր կատարման, եթե այն հակասում է հասարակական կարգին: Նա նաև վստահեցրել է, որ ՀԷՑ-ի ազգայնացման դեպքում Սամվել Կարապետյանը փոխհատուցում կստանա: Օգոստոսի 9-ին "Հայաստանի էլեկտրական ցանցեր" ընկերության բաժնետեր եւ "Տաշիր Կապիտալ" - ի գլխավոր տնօրեն Նարեկ Կարապետյանը հայց է ներկայացրել ՀՀ Վարչական դատարան՝ ընդդեմ ՀԾԿՀ-ի եւ նրա նախագահ Մեսրոպ Մեսրոպյանի, պահանջելով ճանաչել ՀԾԿՀ-ի ՝ ընկերության մենեջմենթի փոփոխության իրավազորության բացակայությունը:

Ինքը՝ Սամվել Կարապետյանը, ձերբակալվել էր հունիսի 18-ի գիշերը՝ այն բանից հետո, երբ աջակցություն էր հայտնել Հայ Առաքելական Եկեղեցուն: Հունիսի 19-ի գիշերը Երևանի ընդհանուր իրավասության դատարանը երկու ամսով կալանավորել էր Սամվել Կարապետյանին: Նրան մեղադրում են երկրում իշխանությունը զավթելու հրապարակային կոչեր անելու մեջ։ Սակայն հոկտեմբերի 13-ին Քննչական կոմիտեն հայտարարել էր Սամվել Կարապետյանի մեղադրանքը փոխելու և քրեական օրենսգրքի 296-րդ հոդվածի 3-րդ մասի 2-րդ և 3-րդ կետերի լրացման մասին (պաշտոնեական կամ պաշտոնեական լիազորություններն օգտագործելով առանձնապես խոշոր չափերով փողերի լվացում կամ դրանց ձեռք բերած ազդեցություն): Արդյունքում, Հակակոռուպցիոն դատարանը նոյեմբերի 18-ին ևս 2 ամսով երկարաձգել էր կալանքը ։ 2025 թվականի դեկտեմբերի 30-ին նա ազատ է արձակվել տնային կալանքի տակ ՝ մի շարք սահմանափակումներով։