«Արմենիան Քարդ»-ը գործարկել է ArcaQR համակարգը՝ QR-կոդի օգնությամբ վճարումներ անմիջապես բանկային հաշվից

Արմինֆո. «Արմենիան Քարդ» ՓԲԸ-ն ներկայացնում է ArcaQR համակարգը՝ վճարումներ QR-ով, որոնք կատարվում են մեկ սկանով՝ անմիջապես բանկային հաշվից։

Ինչպես նշվում է «Արմենիան Քարդ»-ի հաղորդագրությունում, սեպտեմբերի 30-ին պաշտոնապես մեկնարկում է ArcaQR-ը` դարձնելով ամենօրյա վճարումները պարզ ու հարմար բոլորի համար։ ArcaQR համակարգին մասնակից բանկերի` օգտատերերը կկարողանան մուտք գործել բանկի մոբայլ հավելված, սկանավորել QR-ը և կատարել վճարումը ցանկացած բանկային հաշվից։ «Արմենիան Քարդ» ՓԲԸ գործադիր տնօրեն Վարդան Խաչատրյանը նշել է․«ArcaQR-ը մեր հերթական քայլն է՝ զարգացնելու անկանխիկ վճարումների մշակույթը Հայաստանում։ Մենք համոզված ենք, որ QR վճարումները կդառնան առօրյայի մի մասը՝ առաջարկելով սպառողներին հարմարավետություն, բիզնեսներին պարզ ու մատչելի վճարումների հնարավորություն, իսկ գործընկեր բանկերին՝ մոբայլ հավելվածի օգտագործման հաճախականության ավելացում»։

«Որպես թվային բանկ՝ Evocabank-ի համար շատ կարևոր է միանալ ArcaQR համակարգին, քանի որ վճարումների ոլորտի զարգացումը մեր ռազմավարական ուղղություններից մեկն է։ Մենք վստահ ենք, որ ArcaQR-ի կիրառմամբ վճարումները կդառնան ավելի հարմար, արագ և ապահով», - նշել է Evocabank-ի Վարչության նախագահի տեղակալ Տաթևիկ Խաչատրյանը։

Ամերիաբանկի մանրածախ բանկինգի գծով տնօրեն Արման Բարսեղյանը նշել է․«Ուրախ ենք միանալ ArcaQR նախաձեռնությանը, որի մեկնարկը կարևոր քայլ է ոչ միայն հաճախորդների սպասարկման մակարդակի բարձրացման, այլև` ամբողջ համակարգի համաչափ և կայուն զարգացման ուղղությամբ։ Ամերիաբանկը հետևողականորեն ներդնում է նորարար լուծումներ՝ նպաստելով անկանխիկ վճարումների զարգացմանը և հաճախորդների համար առավել հարմարավետ գործիքների կիրառմանը։ Լիահույս ենք, որ միասնական QR վճարումները կնպաստեն թվային վճարումների ավելի լայն տարածմանը և մեր հաճախորդների փորձառության բարելավմանը»։

Կոնվերս Բանկի մանրածախ դեպարտամենտի տնօրեն Արամ Բալոյանն ասել է. «Կոնվերս Բանկը կարևորում է բանկային հաշվի ծառայության և Converse Mobile հավելվածի` որպես հիմնական թվային ուղու զարգացումը։ Այս տեսանկյունից չափազանց կարևոր է շուկայում վճարային գործիքների և ենթակառուցվածքների ընդլայնումը և զարգացումը, ազգային վճարային համակարգերի շուրջօրյա սերվիսների ձևավորումը։ Մենք հանձնառու ենք այս նպատակների իրագործմանը և առաջիններից ենք միանում նոր ArcaQR համակարգին։ Բանկը, իր ռազմավարության շրջանակում, շարունակելու է իր ծառայություններն ընդլայնել՝ ներդնելով վճարային այլընտրանքային գործիքներ»։

«ArcaQR վճարային գործիքի ավելացումը, կարծում եմ, մեծ ձեռքբերում է ընդհանուր համակարգի համար։ Որքան հասանելի լինեն Arca ազգային վճարային համակարգի ծրագրերը հաճախորդների համար, այդքան ակնհայտ կլինի համակարգի կայունությունը, համակարգի հանդեպ վստահությունը։ Ուրախ եմ, որ ԱրարատԲանկը միացել է այս ծրագրին,

և իր մասնակցությամբ աջակցում է ծրագրի կայացմանն ու զարգացմանը»,- նշել է ԱրարատԲանկի վարչության նախագահ, գործադիր տնօրեն Մհեր Անանյանը։

Հայէկոնոմբանկի գործադիր տնօրենի տեղակալ Վահե Ղազարյանը նշել է․ «Հայէկոնոմբանկի համար ArcaQR համակարգին միանալը կարևոր քայլ է հաճախորդներին առավել պարզ, հարմար և ժամանակակից վճարային լուծումներ առաջարկելու առումով։ Հայէկոնոմբանկի զարգացման ռազմավարության հիմքում ընկած են նորարարական ծառայությունները, որոնք նպաստում են ոչ միայն հաճախորդների փորձի բարելավմանն, այլ նաև անկանխիկ վճարումների մշակույթի զարգացմանը։ Կարծում եմ ArcaQR համակարգը մեր հաճախորդների անկանխիկ գործարքների համար կապահովի արագություն, հարմարավետություն և անվտանգություն թվային միջավայրում»։

«ArcaQR համակարգի ստեղծումը նշանակալից քայլ է՝ ապհովելու վճարային ենթակառուցվածքների անընդհատությունը, անվտանգությունը և անխափան աշխատանքը: Արդշինբանկը շատ է կարևորում ArcaQR hամակարգի մեկնարկը և ուրախ է հանդես գալ որպես համարկարգի մասնակից՝ առաջարկելով այլընտրանքային և անվտանգ վճարային լուծումներ՝ անկանխիկ վճարումների մշակույթը խթանելու, հաճախորդների ամենօրյա բանկային կարիքները բավարարելու, նրանց փորձառության և սպասարկման որակը բարձրացնելու համար», - նշել է Արդշինբանկ ՓԲԸ վարչության անդամ, ՓՄՁ բիզնեսի տնօրեն Միհրան Մուրադյանը:

Նշենք, որ 2025թ. հունվարի կեսերին ՀՀ ԿԲ խորհուրդը որոշում է կայացրել ս. թ. հոկտեմբերից ներդնել QR կոդերի օգտագործմամբ վճարումների կամ փոխանցումների ժամանակ գործառնական համատեղելիության ապահովման պահանջը: Մասնավորապես, QR կոդի միջոցով վճարման հնարավորություն ընձեռող բոլոր ֆինանսական կազմակերպությունների հավելվածների միջոցով հնարավոր կլինի վճարումներ կատարել բանկերի և վճարահաշվարկային կազմակերպությունների կողմից առևտրի և/կամ ծառայությունների կետերում տեղադրվող QR կոդի մեկ պատկերի միջոցով: Այդ առնչությամբ QR կոդի միջոցով վճարման հնարավորություններ ունեցող ֆինանսական հաստատությունները պետք է երաշխավորեն, որ վճարումները կամ փոխանցումները կատարվում են իրենց կողմից տրամադրվող հավելվածների միջոցով ՝ օգտագործելով QR կոդի մեկ պատկերը։ Առաջարկվող կարգավորման նպատակն է QR կոդի միջոցով վճարումների կամ փոխանցումների գործընթացները դարձնել հարմար և արդյունավետ ինչպես վճարողների, այնպես էլ ծառայություններ մատուցողների, ինչպես նաև ֆինանսական կազմակերպությունների համար: QR կոդերի օգտագործմամբ վճարումների կամ փոխանցումների գործառնական համատեղելիության այս պահանջը վերաբերում է բացառապես QR վճարային ծածկագրերին և չի տարածվում ապրանքային QR կոդերի վրա (ներառյալ հասարակական տրանսպորտում օգտագործվող QR կոդերը):

Հիշեցնենք, որ ArcaQR համակարգի գործարկումից առաջ Armenian Card ազգային վճարային համակարգը 2024թ. նոյեմբերին ներդրել է նոր նորարարական ArCa Pay ապրանքը՝ արդյունավետ, անվտանգ և հարմար հարթակ հայաստանյան բանկերի և վճարային կազմակերպությունների հաճախորդների միջև ակնթարթային փոխանցումների համար: Դրան անմիջապես միացել են Ամերիաբանկը, Էվոկաբանկը, Կոնվերս Բանկը և Ամիո Բանկ-ը: Առաջիկա ծրագրերի մեջ է մտնում Հայաստանի գրեթե բոլոր բանկերի և վճարահաշվարկային կազմակերպությունների միացումն այդ համակարգին։