ՀՀԿ. Հայաստանի վարչապետը խոսում է խաղաղության մասին, բայց չի կարողանում անգամ ապահովել հայկական բեռնատարների բնականոն անցումը վրացական անցակետով

Արմինֆո.  Հայաստանի վարչապետ Նիկոլ Փաշինյանն անդադար խոսում է Ադրբեջանի հետ խաղաղության հաստատման մասին, մինչդեռ, չի կարողանում, անգամ, ապահովել հայկական բեռնատարների անարգել անցումը վրացական անցակետերով դեպի Եվրասիական տնտեսական միության (ԵԱՏՄ) երկրներ: Այդ մասին ֆեյսբուքյան իր էջից տեսաուղերձով հայտարարել է ՀՀԿ երիտասարդական թևի ղեկավար Հենրիկ Դանիելյանը։

Ինչպես հիշեցրել է երիտասարդական թևի ղեկավարը, արտահանմանն սկսել են խոչընդոտել Ռուսաստանի և Վրաստանի սահմանին ։ Այնտեղ, նրա ասելվ, հայ արտահանողներից սկսել են որոշակի գումար պահանջել անցակետով անցնելու համար։ Մինչդեռ, Հայաստանի պետական մարմինների ոչ մի ներկայացուցիչ, ինչպես նշել է Դանիելյանը, չի զբաղվել այդ խնդրով եւ ոչ մի քայլ չի ձեռնարկել այդ ուղղությամբ: "Հայկական բեռնատարներն արդեն մի քանի օր պարապուրդի են մատնված և չեն կարողանում անցնել ԵԱՏՄ անդամ որևէ երկիր։ Ակնհայտ է, որ այս ամենը Հայաստանի իշխանությունների անփառունակ աշխատանքի արդյունքն է։ Վարչապետ Նիկոլ Փաշինյանն, ըստ էության, ամեն ինչ անում է իր քաղաքացիների կյանքը բարդացնելու համար", - կարծում է Դանիելյանը։

Նա, միաժամանակ, ուշադրություն է հրավիրել այն փաստի վրա, որ դա լրացուցիչ բեռ է բեռնատարների վարորդների համար, քանի որ ամեն օր ավելի ու ավելի աճող գումար է, որը պետք է հանվի նրանց աշխատավարձից: "Բեռնատարների վարորդները չեն կարող իրենց նման ծախսեր թույլ տալ և բեռնատարների վարձակալությունից բացի վրացական կողմին վճարել անցակետն անցնելու համար", - նշել է ՀՀԿ երիտթևի անդամը:

Քաղաքական գործիչն ուշադրություն է հրավիրել, որ, ըստ էության, դա տարանցիկ գոտի է, և նման խնդիրներն արհեստականորեն ստեղծված են և վաղուց պետք է լուծվեին: "Մենք պետություն ենք, ուրեմն կառավարությունը պետք է զբաղվեր այդ խնդրով։ Կան մարդիկ, ովքեր պարտավոր են զբաղվել այդ հարցերով։ Հիշեցնեմ, որ ռուս-վրացական պատերազմի ժամանակ քաղաքացիներն անարգել անցնում էին ճանապարհը։ Իսկ այսօր մեր քաղաքացիներին մեն-մենակ են թողել այս խնդրի հետ, և ոչ ոք նրանց չի էլ տեղեկացնում, թե ինչ պետք է անեն այս իրավիճակում։ Առավել ևս, չկա մեկը, ով նրանց տեղյակ պահի, որ իրենք իրավունք ունեն առանց որևէ վճարի անցնել այդ ճանապարհը", - դժգոհել է Դանիելյանը։

Վերն ասվածի առնչությամբ նա հռետորական հարց է հնչեցրել, թե ինչպես են Հայաստանի իշխանությունները պատրաստվում վերահսկել այն ճանապարհները, որոնք կբացվեն Թուրքիայի և Ադրբեջանի հետ, եթե անգամ չեն կարողանում կապ ապահովել Ռուսաստանի և ԵԱՏՄ այլ երկրների հետ, ինչպես նաև պատշաճ կերպով անցնել Վրաստանի անցակետով։ "Եվ դա այն դեպքում, երբ մեր արտադրանքի 80 տոկոսն արտահանվում է հենց Ռուսաստան։ Այս ամենը մեծ հարված կհասցնի մեր տնտեսությանը, առավել ևս ՝ անվտանգությանը, այդ թվում՝ տնտեսական, քանի որ այսօր դա միակ ճանապարհն է, որով մեր ապրանքներն ուղղվում են դեպի ԵԱՏՄ երկրներ", - եզրափակել է Դանիելյանը։

 Հիշեցնենք, որ այսօր Վրաստանի տարածքով Հայաստանը Ռուսաստանի հետ կապող միակ ցամաքային երթուղին «Վերին Լարս» անցակետով անցնող ճանապարհն է:

Նախօրեին Ռուսաստանի կառավարության փոխնախագահ Ալեքսեյ Օվերչուկը հայտարարել է, որ ընթացիկ տարվա վերջին Հայաստանի և Ռուսաստանի միջև փոխադարձ առևտրի ծավալը գրեթե կրկնակի կկրճատվի: