Հայաստանի արտարժույթի միջբանկային շուկայում 2025թ. օգոստոսի 18-22-ը դոլարային գործարքների անկումն ուղեկցվել է ռուբլով գործարքների աճով

Արմինֆո. Հայաստանի արտարժույթի միջբանկային շուկայում 2025թ. օգոստոսի 18-22-ը դոլարային գործարքների անկումն ուղեկցվել է ռուբլով գործարքների աճով։ Եվրոյով գործարքներ արդեն երեք ամիս չեն իրականացվում։

Մասնավորապես, դոլարային գործարքների շաբաթական թրենդը ծավալվել է 95,4 տոկոս աճից դեպի 75,3 տոկոս անկում, իսկ ռուբլով գործարքների թրենդը 69,2 տոկոս անկումից հասել է 5 անգամ աճի։ Արդյունքում՝ ռուբլով գործարքների շաբաթական ծավալը 3 անգամ գերակշռել դոլարային գործարքների նկատմամբ, մինչդեռ, մեկ շաբաթ առաջ հակառակ պատկերն է դիտվել՝ դոլարային գործարքների ընդհանուր շաբաթական ծավալը 7 անգամ գերազանցել է ռուբլով գործարքները։

Դրան զուգահեռ, արտարժույթի ներբանկային շուկայում հաշվետու շաբաթվա ընթացքում (18-22.08.25-ը ' 11-15.08.25-ի համեմատ) դոլարի առքուվաճառքի անկումը պահպանվել է՝ տեմպերի արգելակմամբ, եվրոյի առքն աճել է՝ վաճառքի անկման դանդաղման դեպքում, իսկ ռուբլով գործարքներում առքի անկման արագացումն ուղեկցվել է վաճառքի անկմամբ։

Արդյունքում՝ ս.թ. օգոստոսի 18-22-ն ընկած ժամանակահատվածում դրամը շարունակել է արժևորվել ինչպես դոլարի նկատմամբ' 382,5-ից մինչև 381,5 դրամ/1դոլար, այնպես էլ եվրոյի նկատմամբ' 446-ից մինչև 443,5 դրամ/1եվրո, իսկ ռուբլու նկատմամբ' 4,76-ից մինչև 4,73 դրամ/1 ռուբլի: Մեկ տարի առաջ ՝ 2024թ.օգոստոսի 22 - ին, դրամի փոխարժեքը դոլարի նկատմամբ կազմել է 387,8 դրամ/1 դոլար, եվրոյի նկատմամբ ՝ 429 դրամ/1եվրո, և ռուբլու նկատմամբ՝ 4,25 դրամ/1 ռուբլի, ինչը ներկայիս փոխարժեքների համեմատ վկայում է դոլարի նկատմամբ դրամի տարեկան արժևորման և եվրոյի ու ռուբլու նկատմամբ արժեզրկման մասին։