Ռոմանոս Պետրոսյանը վստահեցնում է. ՀԷՑ-ում գործընթացները սկսվել են մոտ մեկ տարի առաջ և քաղաքական ենթատեքստ չունեն

Արմինֆո.  Ռուսաստանաբնակ գործարար Սամվել Կարապետյանին պատկանող "Հայաստանի էլեկտրական ցանցեր" ՓԲԸ-ում գործընթացները սկսվել էին դեռ մոտ մեկ տարի առաջ, երբ Ազգային ժողովում տեղի ունեցան լսումներ, որոնց արդյունքում մի շարք պաշտոնյաներ ազատվեցին զբաղեցրած պաշտոններից: Այդ մասին լրագրողների հետ զրույցում հայտարարել է "Հայաստանի էլեկտրական ցանցեր" ՓԲԸ ժամանակավոր կառավարիչ Ռոմանոս Պետրոսյանը, ով իր աշխատանքային առաջին իսկ օրը աշխատավայր է ներկայացել ուշացումով և շքախմբով: "Այս գործընթացի սկիզբը դրվել է դեռ մոտ մեկ տարի առաջ ։ Այսպես, կարգավորող հանձնաժողովի նախկին նախագահը պաշտոնը լքել է իր պաշտոնավարման երկրորդ ժամկետի սկզբու ։ Իսկ մոտ ութ ամիս առաջ պաշտոնից ազատվել է ՏԿԵ փոխնախարարը, որը պատասխանատու էր էներգետիկայի ոլորտի համար", - հիշեցրել է ՀԷՑ-ի ժամանակավոր կառավարչը ։

Այդ առումով Պետրոսյանը համոզմունք է հայտնել, որ "Հայաստանի էլեկտրական ցանցեր" ՓԲԸ-ի սեփականատեր Սամվել Կարապետյանը, գիտակցելով տեղի ունեցող իրադարձությունների կուլմինացիան, փորձել է իրավիճակը բերել քաղաքական հարթակ: "Սակայն ես խնդրում եմ այդ գործընթացը ոչ մի դեպքում չքաղաքականացնել", - հավելել է նա:

Պաշտոնյան շարունակել է հավաստիացնել, որ մասնավոր հատվածի ընկերությունների սեփականատերերը, ստանալով լիցենզիաներ, ըստ էության, համաձայն են, որ պետական մարմինները և կարգավորող հանձնաժողովները կարող են միջամտել և կանխարգելիչ միջոցառումներ իրականացնել իրենց գործունեության մեջ: "Դա լիցենզիայի պահանջներից մեկն էր, և հենց այդ պահանջի իրականացումն է հիմա տեղի ունենում", - հավելել է Պետրոսյանը:

Անդրադառնալով պաշտոնանկություններին՝ ՀԷՑ-ի ժամանակավոր կառավարիչը վստահեցրել է, որ զանգվածային ազատումներ չեն սպասվում։ Նա նշել է, որ նման հայտարարությունները շահարկում են։ Այդ առումով Նիկոլ Փաշինյանի զինակիցը հիշեցրել է, որ ինքը "Քաղաքացիական պայմանագիր" կուսակցության անդամ է, որը "վերջին տարիներին տասնյակ աշխատատեղեր է ստեղծել"։ Պետրոսյանը ևս մեկ անգամ ընդգծել է, որ զանգվածային ազատումներ չեն լինի, սակայն ազատումները կվերաբերվեն ընկերության թոփ-մենեջերներին, որոնց ղեկավարումն, ըստ նրա, ընկերությանը հասցրել է ներկա վիճակի: Մասնավորապես, նա հայտարարել է "Հայաստանի էլեկտրական ցանցեր" ՓԲԸ գլխավոր տնօրենի պաշտոնակատար Դավիթ Ղազինյանին պաշտոնից ազատելու մտադրության մասին՝ ընկերության շուրջ տեղի ունեցող գործընթացների վերաբերյալ իր հնչեցրած գնահատականների պատճառով։

"Իսկ մյուս աշխատակիցների մասով քննարկումներ կլինեն։ Ես վստահեցնում եմ, որ իմ բոլոր հետագա գործողությունները բխելու են հանրապետության շահերից", - հավելել Է Պետրոսյանը, ընդգծելով իր վճռականությունը՝ հետեւողական լինել ցանկացած սաբոտաժի նկատմամբ, որը կարող է առաջանալ ընկերության աշխատանքի ընթացքում։ Նա աշխատակիցներին հորդորել է կատարել իրենց աշխատանքը, տեղի չտալ սաբոտաժի և հիշել, որ դա քրեորեն պատժելի արարք է:

Հիշեցնենք, որ հուլիսի 8-ին իրավապահները ներխուժել էին ՀԷՑ-ի գլխամասային գրասենյակ, որը 2016 թվականից "Տաշիր" ընկերությունների խմբի կազմում է: "Տաշիր" ընկերությունների խմբի նախագահ Սամվել Կարապետյանը կալանավորվել է Հայաստանի իրավապահ մարմինների կողմից՝ այն բանից հետո, երբ աջակցություն էր հայտնել Հայ Առաքելական Եկեղեցուն: Այնուհետև ԱԺ օրակարգ էր բերվել մի օրինագիծ, որով հիմք է դրվում "Հայաստանի էլեկտրական ցանցեր"ՓԲԸ-ի ազգայնացման համար: Իսկ հուլիսի 18-ին ՀՀ Հանրային ծառայությունները կարգավորող հանձնաժողովի նախագահ Մեսրոպ Մեսրոպյանը Պետական վերահսկողական ծառայության նախկին ղեկավար Ռոմանոս Պետրոսյանին նշանակել է "Հայաստանի էլեկտրական ցանցեր"ՓԲԸ ժամանակավոր կառավարիչ: