«Տաշիր» ԸԽ-ում ուսումնասիրում են ՀԾԿՀ ղեկավարի որոշումը

Արմինֆո. "Հայաստանի էլեկտրական ցանցեր" փակ բաժնետիրական ընկերությունը ստացել է Հանրային ծառայությունները կարգավորող հանձնաժողովի նախագահի որոշումը: ՀԾԿՀ ղեկավարի ներկայացրած գնահատականների ուսումնասիրության արդյունքում "Տաշիր" ընկերությունների խումբը որոշում կկայացնի հետագա քայլերի վերաբերյալ: Այդ մասին ԱրմԻնֆո-ին հաղորդել են ԸԽ-ին մոտ  աղբյուրները:

"Մենք նոր ենք ստացել ՀԾԿՀ ղեկավարի որոշումը և պետք է մանրակրկիտ ուսումնասիրենք այն, որից հետո միայն կմտածենք հետագա գործողությունների մասին", - նշել է աղբյուրը՝ ի պատասխան այն հարցի, թե արդյոք բողոքարկվելու է այդ որոշումը դատարաններում, այդ թվում ՝ միջազգային արբիտրաժային դատարաններում:

Հիշեցնենք, որ ՀՀ Ազգային ժողովի հուլիսի 3-ի արտահերթ նիստում երկրորդ եւ վերջնական ընթերցմամբ փոփոխություններ են կատարվել "Հանրային ծառայությունները կարգավորող մարմնի մասին", "Էներգետիկայի մասին", "Սնանկության մասին" եւ "Իրավաբանական անձանց պետական գրանցման, իրավաբանական անձանց առանձնացված ստորաբաժանումների, հիմնարկների եւ անհատ ձեռնարկատերերի պետական հաշվառման մասին" օրենքներում, որոնցով, գործնականում սկսվել է "Հայաստանի էլեկտրական ցանցեր" ՓԲԸ-ի ազգայնացման գործընթացը: Օրինագծերի փաթեթի համաձայն, որը մշակել էր  "Քաղաքացիական պայմանագիր" խմբակցությունը, Հանրային ծառայությունները կարգավորող հանձնաժողովի նախագահը ընկերությունների գործունեության լուրջ խախտումների մասին ահազանգեր ստանալու դեպքում իրավունք կստանա վարույթ հարուցել, որը պետք է հաստատվի ՀԾԿՀ խորհրդի կողմից: Այդ ժամանակահատվածում ՀԾԿՀ-ը կարող է փոխել ընկերության ղեկավարությունը՝ հրավիրելով էներգետիկայի կամ կառավարման ոլորտում առնվազն 5 տարվա աշխատանքային փորձ ունեցող ժամանակավոր կաառավարիչի, որը կաշխատի մինչեւ ուսումնասիրությունների ժամկետի ավարտը, որի արդյունքներով էներգետիկայի ոլորտի ընկերությունները կամ կառաջարկեն խախտումների վերացման գործողությունների ծրագիր, կամ կզրկվեն լիցենզիայից: Վերջին դեպքում սեփականատերերը պետք է վաճառեն ընկերությունները, ընդ որում, կառավարությանը 3 ամսվա ընթացքում կպահպանի գնման արտոնյալ իրավունք։ Եթե սեփականատերը 2 ամսվա ընթացքում հրաժարվում է վաճառքից, ապա վարչական կարգով կարող է նշանակվել բաժնետոմսերի վաճառքի առնչությամբ սակարկություն: Փաթեթում ուղղակիորեն չի խոսվում "Հայաստանի էլեկտրական ցանցեր" ընկերության մասին, թեև բոլորն էլ հասկանում են, որ խոսքը հենց դրա մասին է։

Ավելի վաղ "Տաշիր" ընկերությունների խումբը, որի կազմում է նաեւ "ՀԷՑ" ՓԲԸ-ն, հայտարարություն էր տարածել,  որի համաձայն, Սամվել Կարապետյանի ընտանիքը ներդրումային վեճ է սկսել Հայաստանի իշխանությունների հետ, որը նախատեսում է նաև դիմել Միջազգային արբիտրաժ:

Սամվել Կարապետյանի գլխավորած "Տաշիր" ընկերությունների խումբը 2015 թվականի սեպտեմբերին "Ինտեր ՌԱՕ" - ից ձեռք է բերել "Հայաստանի էլեկտրական ցանցեր" ՓԲԸ-ն: Ավելի վաղ Սամվել Կարապետյանը նշել էր, որ 2016 թվից ի վեր, երբ "Տաշիր" ընկերությունների խումբը ստանձնեց սեփականության իրավունքը, "Հայաստանի էլեկտրական ցանցեր"-ում, ընդհանուր առմամբ, ներդրվել է շուրջ 900 մլն դոլար, որից 680 մլն դոլար՝ արդիականացման, և 200 մլն դոլար՝  նոր հզորությունների ստեղծման համար: Ներդրումներն իրականացվել են նաեւ միջազգային ֆինանսական կառույցների վարկային ռեսուրսների հաշվին, ինչը հանգեցրել է ՓԲԸ-ի 100% բաժնետոմսերի գրավադրման:

ՀԷՑ-ը կառավարում է Հայաստանի միջին և ցածր լարման բաշխիչ ցանցերը՝ սպասարկելով շուրջ 1 մլն բաժանորդի: