Փաստաբան. ՀԷՑ-ի շուրջ դիտվում է իրավական ահաբեկչություն

Արմինֆո.  Հայաստանում սկսվել է խուզարկությունների հերթական մասշտաբային շքերթը։ Այդ մասին հուլիսի 8-ին լրագրողներին հայտարարել է փաստաբան Արամ Վարդևանյանը։

Նրա խոսքով՝ խուզարկությունների թեման այլեւս չպետք է զարմացնի երկրի հասարակայնությանը, չնայած այն հանգամանքին, որ դրանք անցկացնելու իրավունքը պետք է լինի ավելի քան հիմնավորված: Վարդևանյանը նշել է, որ խուզարկություններն անմիջականորեն  առնչություն ունեն "Տաշիր" ընկերությունների խմբի նախագահ Սամվել Կարապետյանի ընտանիքի հետ,  այդ թվում՝ "Հայաստանի էլեկտրական ցանցեր" ՓԲԸ տնօրենների խորհրդի նախագահ Նարեկ Կարապետյանի։ Այս ֆոնին դժվար է պնդել, թե կոնկրետ ինչ են փնտրում իրավապահները։

"Նրանք Նարեկ Կարապետյանի տնից առգրավել են քննության համար շատ կարևոր երկու հանցանշան՝ 2 գլխարկ։ Ըստ երեւույթին, երբ որոշում է կայացվել խուզարկություններ կատարելու մասին, հենց այդ երկու իրերն էին փնտրում", - սարկազմով հայտարարել է փաստաբանը, հավելելով, որ, ամենայն հավանականությամբ, այդ երկու գլխարկները երեւացել են ի աջակցություն Սամվել Կարապետյանի վերջին հանրահավաքի ժամանակ։ Վարդևանյանը նշել է, որ ՀԷՑ-ի շուրջ դիտվում է իրավական ահաբեկչություն։

Փաստաբանը նշել է, որ Նարեկ Կարապետյանի կարգավիճակի մասին առայժմ տեղեկություն չկան: Բուն գործընթացը Վարդևանյանը որակել է հակասահմանադրական։ "Թե ինչով կավարտվի այս ամենը, ցույց կտա ժամանակը։ Իսկ ցանցերի ազգայնացումը, ամեն դեպքում, ենթադրում է վնասի փոխհատուցում", - ասել է փաստաբանը, նշելով, որ Հանրային ծառայությունները կարգավորող հանձնաժողովը չի հայտնաբերել ՀԷՑ-ին վերագրվող խախտումներ։ Ընդհակառակը, ՀԾԿՀ-ն արձանագրել է խոշոր ներդրումներ։ ՀԷՑ-ի ազգայնացման մասին օրենքի նախագիծը համարելով հակասահմանադրական՝ Վարդեւանյանը հավաստիացրել է, որ գործարկվելու են ինչպես հայրենական, այնպես էլ միջազգային դատական ատյանները:

Հուլիսի 8-ի վաղ առավոտից իրավապահ մարմինների ներկայացուցիչները խուզարկություններ են իրականացնում "Հայաստանի էլեկտրական ցանցեր" ընկերության գլխամասային գրասենյակում: Ազգային անվտանգության ծառայության դիմակավորված աշխատակիցները ընկերության աշխատակիցներին թույլ չեն տալիս մուտք գործել աշխատավայր: Միաժամանակ, իրավապահներն առավոտից ներխուժել են ՀԷՑ-ի տնօրենների խորհրդի նախագահ Նարեկ Կարապետյանի տուն, որտեղ նույնպես խուզարկություններ են իրականացվել: Այնուհետեւ Նարեկ Կարապետյանին տեղափոխել են ՀԷՑ-ի գլխամասային գրասենյակ:

Ավելի վաղ Հայաստանի խորհրդարանն ընդունել էր օրենսդրական փոփոխությունների փաթեթ, որոնք ուղղված են ազգայնացմանը:

 Հիշեցնենք, որ բարերար եւ "Տաշիր" ընկերությունների խմբի նախագահ Սամվել Կարապետյանը Հայաստանի իրավապահ մարմինների կողմից ձերբակալվել էր հունիսի 18-ի գիշերը Երեւանում՝ այն բանից հետո, երբ Հայ Առաքելական Եկեղեցուն աջակցություն էր հայտնել: Դրան ի պատասխան ՝ բացահայտ սպառնալիքներ էին հնչել վարչապետի կողմից։ Հունիսի 19-ի գիշերը Երևանի ընդհանուր իրավասության դատարանը երկու ամսով կալանավորել է Սամվել Կարապետյանին: Նա պահվում է "Երևան - Կենտրոն" ՔԿՀ-ում (հայտնի "ՊԱԿ-ի նկուղը" ՝ ԱԱԾ շենքում)։ Նրան մեղսագրվում են երկրում իշխանությունը զավթելու հրապարակային կոչեր։ Կարապետյանը մեղքը չի ընդունում։