Փորձագետ. Հայաստանի մարզերում տեխնոլոգիական աճն անհնար է առանց բիզնեսի եւ պետության աջակցության

Արմինֆո.  Բիզնեսն ու պետությունն առանցքային դեր են խաղում Հայաստանի մարզերում տեխնոլոգիական ներուժի իրացման գործում։ Վանաձորում TechWeek 2025 միջոցառման հարթակներում նման կարծիք է հայտնել դրա համակազմակերպիչ և Zealous ընկերության ֆինանսական տնօրեն Սպարտակ Կյուրեղյանը՝ պատասխանելով ԱրմԻնֆո-ի թղթակցի հարցին:

Նա նշել է, որ, ինչպես Երևանում, այնպես էլ մարզերում ապրում են տաղանդավոր և ընդունակ երեխաներ: Բայց մայրաքաղաքում իրացման ավելի շատ հնարավորություններ կան, քանի որ այնտեղ կենտրոնացած են ավելի շատ բիզնեսներ, այդ թվում ՝ տեխնոլոգիական: «Եվ մեր դերը գոնե TechWeek-ի շրջանակներում երիտասարդների իրազեկման և զարգացման հնարավորություններ ստեղծելն է: Բայց, բացի մեզանից, այստեղ անհրաժեշտ է նաև բիզնեսի և պետության ակտիվ մասնակցությունը», - ասել է Կյուրեղյանը։

Խոսելով մարզերում տիրող իրավիճակի մասին՝ Վանաձորի օրինակով, նա ընդգծե է, որ քաղաքում տարիներ շարունակ ոչ մի նոր բան չի կառուցվել, կան բազմաթիվ բարդություններ՝ ինչպես ենթակառուցվածքային, այնպես էլ կրթական: «Դա ավելի շատ տնտեսական խնդիր է», - նշել է նա: TechWeek-ի համակազմակերպիչն այդ առնչությամբ ուշադրություն է հրավիրել այն հանգամանքի վրա, որ մայրաքաղաքում կա բիզնեսի լուրջ կենտրոնացում եւ, համապատասխանաբար, այժմ հասունացել է զարգացման ոչ համամասնական քայլերի իրականացման անհրաժեշտությունը: «Պետք է մտածել, թե ինչպես ներգրավել բիզնեսը մարզում, որպեսզի նրանք այստեղ իրենց ներկայացուցչությունները բացեն, իսկ պետությունն աջակցի այդ գործընթացին։ Դա կօգնի հնարավորություններ ստեղծել մարզերում տաղանդների բացահայտման եւ ՏՏ ոլորտի աճի համար», - ընդգծել է Կյուրեղյանը։

Միջոցառման համակազմակերպիչ, DigiTec - ի գործադիր տնօրեն Խաչատուր Հակոբյանն, իր հերթին, լրագրողների հետ զրույցում հավելել է, որ նման միջոցառումներ պետք է շատ ավելի հաճախ անցկացնել մարզերում ՝ երեք ամիսը մեկ, կիսամյակը մեկ պարբերականությամբ: «Մեր առաքելությունը Հայաստանի մարզերում TechWeek-ի այս բովանդակալից մոդելն ավելի մատչելի դարձնելն է: Մենք չենք ցանկանում, որ այս իրադարձությունը նման լինի ճյուղի մարդկանց ինչ-որ հանդիպման, ովքեր, պարզապես, հանդիպել են, զրուցել և ցրվել: Կարևոր է, որպեսզի յուրաքանչյուրն իր համար ինչ-որ բան վերցնի այստեղից։ Եվ մենք դեռ շատ աշխատանք ունենք իրականացնելու այդ ուղղությամբ», - ասել է համակազմակերպիչը։

Նշենք, որ TechWeek-ը Հայաստանում անցկացվում է արդեն երրորդ տարին անընդմեջ։ Այն առաջին անգամ կազմակերպվել է Ստեփանակերտում, նախորդ տարի՝ Գյումրիում, իսկ այս տարի հուլիսի 4-6 - ը ՝ Վանաձորում։ 2026 թվականին միջոցառումը կանցկացվի Գորիսում։ TechWeek ծրագիրը բավականին հագեցած էր։ Երեք օրվա ընթացքում տեղի են ունեցել համաժողովներ, արդիական թեմաներով պանելային քննարկումներ, ելույթներ ոլորտի ավելի քան 60 փորձագետների, կարծիքի առաջնորդների, ՏՏ բիզնեսի ներկայացուցիչների, ֆինթեքի, ներդրողների մասնակցությամբ: Միջոցառման հարթակում բացվել է կրթական Էքսպո, անցկացվել են Wings նորարարական գաղափարների մրցույթ և DevHacks հաքաթոն: Ընդհանուր առմամբ, TechWeek-ի միջոցառումներին մասնակցել է ավելի քան 2800 մարդ:

Նշենք, որ Tech Week Vanadzor-ի նախաձեռնողներն էին TCF-ը, Zealous-ը և Առաջատար տեխնոլոգիաների ընկերությունների միությունը (UATE):