ՀՀ ֆինանսների նախարար. 2025 թվականին Հայաստանի պետբյուջեի պակասուրդի տեսակարար կշիռը երկրի ՀՆԱ-ում կկազմի 5,5 տոկոս

Արմինֆո.2025 թվականին Հայաստանի պետական բյուջեի պակասուրդի տեսակարար կշիռը երկրի ՀՆԱ-ում կկազմի 5,5 տոկոս։ Այդ մասին նոյեմբերի 12-ին ԱԺ լիագումար նիստի ժամանակ հայտարարել է  ֆինանսների նախարար Վահե Հովհաննիսյանը ՝ պատասխանելով ԱԺ ընդդիմադիր "Հայաստան" խմբակցության պատգամավոր Արծվիկ Մինասյանի հարցին։

Պատգամավորը հիշեցրել է, որ, կառավարության ծրագրի համաձայն, պետական պարտքը կարող է աճել առավելապես ներքին աղբյուրների հաշվին և ազգային արժույթով: Մինչդեռ, միայն 2025 թվականին պետական պարտքի սպասարկմանը նախատեսվում է ուղղել ավելի քան 609 մլրդ դրամ, որից շուրջ 256 մլրդ դրամ ՝ ներքին փոխառությունների, և 344 մլրդ դրամ ՝ արտաքին։ Մինասյանն ընդգծել է, որ միայն 2025 թվականին պետական պարտքի սպասարկմանն ուղղվելու է 394 մլրդ դրամ ։ Դրանով իսկ, ընդդիմադիրի համոզմամբ, հաջորդ տարի երկրի բոլոր քաղաքացիները, առանց բացառության, նորածիններից մինչեւ խոր ծերեր, պետք է հրաժարվեն 12 հազար դրամից՝ պետական պարտքի սպասարկման օգուտին։ Պատգամավորն այդ առնչությամբ նախարարից հետաքրքրվել է, թե խոստացված մանկապարտեզներից և դպրոցներից քանիսն են կառուցվելու կամ վերանորոգվելու արտաքին փոխառությունների հաշվին:

Ի պատասխան՝ Վահե Հովհաննիսյանը նշել է, որ միջնաժամկետ ծախսերի ծրագրով նախատեսվում է նվազեցնել պետական պարտքի չափը: 2025 թվականին գրեթե հաջողվել է արտարժույթով և ազգային արժույթով պետական պարտքի հարաբերակցությունը հավասար մակարդակի հասցնել՝ 50% /50%։ Դրաանով իսկ հաջողվել է, նույնիսկ, գերազանցել նախկինում ծրագրված ցուցանիշները։ Ինչ վերաբերում է հաջորդ տարվա ցուցանիշներին, ապա, ինչպես նշել է Հովհաննիսյանը, դա պայմանավորված կլինի մի շարք գործոններով, այդ թվում՝ նաեւ միջազգային շուկայում հայկական եվրապարտատոմսերի պահանջվածության մակարդակով:

Այժմ քննարկումներ են ընթանում հարաբերակցության առավել ընդունելի տարբերակի շուրջ ՝ տոկոսադրույքների բարձրացման հետևանքով առաջացած նոր ճնշումներից խուսափելու նպատակով։ Կառավարության նպատակը, նախարարի հավաստմամբ, Կենտրոնական բանկի կողմից վերաֆինանսավորման տոկոսադրույքի կրճատմանը զուգընթաց նաև տոկոսադրույքների կրճատումն է: Հովհաննիսյանը հավելել է, որ աշխատանքներ են տարվում բնապահպանական քվոտաների դիմաց պետական պարտքի մարման ծրագրի իրականացման ուղղությամբ: Սակայն ոչ Համաշխարհային բանկը, ոչ Ասիական զարգացման բանկը նման մեխանիզմներ չունեն, և երկրի կառավարությունը փորձում է հարցը լուծել երկկողմ ձևաչափով։

"Այս հարցի շուրջ բանակցություններն արդեն մտել են գործնական փուլ, և, կարծում եմ, որ հաջորդ տարի մենք նորություններ կունենանք այդ նախագծի վերաբերյալ", - ասել է նախարարը, հավելելով, որ այս ծրագրի շրջանակներում էական գումարներ պետք չէ ակնկալել:

Նշենք, որ ավելի վաղ նախարարը հաղորդել էր, որ 2025 թվականին Հայաստանը մտադիր է ներգրավել 1,247 մլրդ դոլարի վարկեր: Պետբյուջեի նախագծով պակասուրդը 2025 թվականին կկազմի 609,4 մլրդ դրամ կամ ՀՆԱ-ի 5,5 տոկոսը՝ ընթացիկ տարվա համար հաստատված բյուջեի 482,9 մլրդ դրամի կամ ՀՆԱ-ի 4,6 տոկոսի դիմաց: