Ռուսաստանն աշխատում է Հայաստանում եւ Ղրղզստանում "Միռ" քարտերի գործողության վերականգնման ուղղությամբ

Արմինֆո.Ռուսաստանն աշխատում է Հայաստանում և Ղրղզստանում "Միռ" քարտերի գործարկումը վերսկսելու ուղղությամբ։ Ըստ ՏԱՍՍ-ի՝ այդ մասին հայտարարել է Ռուսաստանի փոխարտգործնախարար Ալեքսանդր Պանկինը՝ Պետերբուրգի միջազգային տնտեսական համաժողովի շրջանակում:

Ընդ որում, նա պարզաբանել է, որ Հայաստանն ու Ղրղզստանը գտնվում են Արևմուտքի ճնշման տակ։ <Իհարկե, [աշխատում ենք]: Փոխգործակցություն է ընթանում, բայց նրանք (Հայաստանն ու Ղրղզստանը) գտնվում են սարսափելի, ծանր ճնշման տակ՝ արեւմտյան երկրների կողմից", - ասել է Ռուսաստանի փոխարտգործնախարարը։

Նրա ասելով՝ արևմտյան երկրները փորձում են տարբեր թույլ կողմեր գտնել աշխարհի հետ նրանց փոխգործակցությունում։ <Հետևաբար, նրանք տրորում են այս ցավոտ տեղը: Տեսնենք, միևնույն է, ավելի լավի հույս ունենք", - հայտարարել է Պանկինը։

Նշենք, որ մարտի 30-ի գիշերը Հայաստանի բանկերը, որոնք հանդիսանում են Armenian Card (ArCa) ազգային վճարային համակարգի մասնակիցներ, դադարեցրել են ռուսական "Միռ" քարտերի սպասարկումը: "Միռ" քարտերի օպերատոր վճարային քարտերի ազգային համակարգը հաստատել է, որ Հայաստանի վճարային համակարգից պաշտոնական ծանուցում է ստացել այն մասին, որ մարտի 30-ից իր մասնակից բանկերը դադարեցնում են ռուսական քարտերի սպասարկումը, "Վեդոմոստի" - ին ասել է ՎՔԱՀ - ի ներկայացուցիչը: "Միռ" քարտերը Հայաստանում աշխատել են 2017 թվականից՝ ՎՔԱՀ-ի և Armenian Card-ի համատեղ նախագծի շրջանակներում: Ազգային քարտերը փոխադարձաբար ընդունվել են երկու երկրների ենթակառուցվածքներում. ArCa-ն ՝ Ռուսաստանում, "Միռ"-ը՝ Հայաստանում: Հայկական մի շարք բանկեր թողարկել են նաև "ArCa-Միռ" քոբեյջինգային քարտեր։

Այժմ ռուսական քարտերով կարելի է վճարել Աբխազիայում, Բելառուսում, Հարավային Օսիայում։ Եվս մի քանի երկրներում "Միռ" քարտերն աշխատում են ոչ ամենուր՝ Վիետնամ, Ղազախստան, Ղրղզստան և Տաջիկստան: Նաև 2023 թվականին Ռուսական քարտերը սկսել են ընդունվել Վենեսուելայում (տեղական խոշորագույն Banco de Venezuela բանկ-էքվայերի միջոցով) և Կուբայում։ Մարտի կեսերին ղազախական Bereke Bank-ը հաղորդել էր Ռուսաստանի ՎՔԱՀ-ի հետ փոխգործակցության դադարեցման մասին։

Հիշեցնենք, որ Կրեմլում Հայաստանի բանկերի կողմից "Միռ" քարտերի սպասարկումից հրաժարվելը չեն գնահատել որպես ոչ բարեկամական քայլ: ՌԴ նախագահի մամուլի քարտուղար Դմիտրի Պեսկովը նման քայլը բացատրել է Արևմուտքի կողմից Երևանի նկատմամբ գործադրվող ճնշմամբ և հավելել, որ Ռուսաստանը կշարունակի աշխատել Հայաստանի հետ՝ իրավիճակը շտկելու նպատակով: Ռուսաստանի ԱԳՆ պաշտոնական ներկայացուցիչ Մարիա Զախարովան նշել է, որ Հայաստանի տնտեսությունն այդ կապակցությամբ զգալի կորուստներ կկրի, երկրի քաղաքացիները կբախվեն լուրջ անհարմարությունների, ՌԴ-ում աշխատող հայերի համար ավելի դժվար կլինի գումար փոխանցել Հայրենիք։ "Քարտերով վճարելու հնարավորությունը կորցնում են նաև զբոսաշրջիկները։ Անցյալ տարի, հիշեցնեմ, նրանց թիվը գերազանցել է 1 միլիոնը։ Կան նաև այլ օրինակներ, թե ինչպես դա կհարվածի Հայաստանի տնտեսությանը։ Ես վստահ եմ, որ, ցավոք, այդ քայլի ծախսերն ավելի բարձր կլինեն, քան արեւմտյան սահմանափակումների հիպոթետիկ վնասը", - ամփոփել է Զախարովան։